छत्तीसगढ़ राजभाषा आयोग के कार्यालय स्थापना दिवस समारोह सम्पन्न
रायपुर। 14 अगस्त के रायपुर म छत्तीसगढ़ राजभाषा आयोग के कार्यालय स्थापना दिवस समारोह मनाय गइस।
ए समारोह माइ पहुना माननीय श्री अमरजीत भगत संस्कृति मंत्री छत्तीसगढ़ शासन, पगरइत डॉ सुरेश शर्मा पूर्व सचिव सँस्कृत विद्यामण्डलम, खास पहुना मीर अली मीर वरिष्ठ कवि, प्रो केसरीलाल वर्मा कुलपति पं रविशंकर विवि, श्री जागेश्वर प्रसाद वरिष्ठ साहित्यकार रहीन।
उंखर पहुनाई सहायक संचालक डॉ तनुजा बघेल अऊ डॉ अनिल भतपहरी सचिव राजभाषा आयोग करीन।
कार्यक्रम म जिला समन्वयक मुकेश कुमार जशपुर डॉ विवेक तिवारी बिलासपुर, रामेश्वर शर्मा रायपुर, कौशल साहू-अनूप श्रीवास्तव कवर्धा, काशीपुरी कुंदन गरियाबंद, रामानन्द त्रिपाठी बेमेतरा, अजय साहू भाटापारा, आशुतोष दुबे पेंड्रा, डॉ राघवेंद्र दुबे, श्री अंजनी तिवारी,
श्री माणिक विश्वकर्मा नवरंग समेत जम्मो जिला समन्वयक अऊ साहित्यकार मन सकलाय रहीन।
ए मउका म राजभाषा के दसा अऊ दिसा छत्तीसगढ़ी म पाठ्यक्रम निर्माण आठवी अनुसूची म संघारे बर उदिम अउ छत्तीसगढ़ी म राजकाज उप्पर नेवताय पहुना सर्वश्री दादुलाल जोशी, चन्द्रशेखर सिंह, डॉ जय भारती चन्द्राकर, कुबेर साहू, कौस्तुभ मणि द्विवेदी, सोमनाथ यादव दुआरा चरचा-गोष्ठी करे गइस।
ए मउका म श्रीमती गीता शर्मा दुआरा अनुवादित "पंचतन्त्र' अउ धनेश्वरी सोनी के पुस्तक के विमोचन पहुना मन करीन। माई पहुना मंत्री महोदय हर उपस्थित साहित्य कार मन के मांग देखत घोषणा करिन कि आयोग डहन ले त्रैमासिक पत्रिका के प्रकाशन करे जाही । आखिरी सत्र म आजादी के अमृत महोत्सव के ऊपर केन्द्रित राष्ट्रीय भाव बोध लिए सुघ्घर काव्य पाठ होइस ।
समारोह ल सफल बनाय बर आयोग के जम्मो अधिकारी अऊ कर्मचारी मन जुटे रहीन।